‘মিছ ইণ্ডিয়াৰ দৰে এটা সন্মানীয় খিতাপ জয় কৰি লাভ কৰা আনন্দ এতিয়াও ভাষাৰে প্রকাশ কৰিব পৰা নাই৷ বহুত ভাল লাগিছিল৷ কিন্তু মই গুৱাহাটী আৰু অসমক প্রতিনিধিত্ব কৰি গৌৰৱ অনুভৱ কৰিছিলোঁ৷’ –অসম আৰু অসমবাসীক দেশবাসীৰ সন্মুখত গৌৰৱান্বিত কৰি ২০১৬ বর্ষৰ ফেমিনা মিছ ইণ্ডিয়া ৱর্ল্ড সন্মান অর্জন কৰা অসম কন্যা প্রিয়দর্শিনী চেটার্জীয়়ে আজি খিতাপ জয়ৰ পাছত প্রথমবাৰলৈ মাতৃভূমিত ভৰি দি এইদৰে কয়৷ দেশৰ সৌন্দর্য প্রতিযোগিতাৰ ক্ষেত্রখনত অতি সন্মানীয় হিচাপে পৰিচিত ফেমিনা মিছ ইণ্ডিয়া প্রতিযোগিতাত বিজয়ী হোৱাৰ মুহূর্তৰ অনুভৱ প্রকাশ কৰিবলৈ ভাষা বিচাৰি নোপোৱা প্রিয়দর্শিনীয়ে বিজয়ী ঘোষণা কৰাৰ সময়ত নিজৰে বিশ্বাস হোৱা নাছিল বুলি কয়৷ বৰঝাৰ বিমান বন্দৰত ভৰি দি আজি মিছ ইণ্ডিয়া প্রিয়দর্শিনীয়ে তেওঁৰ এই কৃতিত্বৰ বাবে বন্ধুবর্গৰ লগতে পৰিয়ালবর্গৰ উৎসাহক কৃতজ্ঞতা জ্ঞাপন কৰে৷ অসমবাসীলৈ ৰঙালী বিহুৰ শুভেচছা জ্ঞাপন কৰি প্রিয়দর্শিনীয়ে বিহুৰ সময়ত মাতৃভূমিলৈ আহিব নোৱাৰি আক্ষেপ কৰে৷ ৰাজ্যৰ কৃতী সন্তান প্রিয়দর্শিনীয়ে কয় যে মিছ ইণ্ডিয়াৰ দৰে এটা সন্মান লাভ কৰিবলৈ সকলোৰে সপোন আৰু আশা থাকে৷ কিন্তু তেওঁ এই সপোন থাকিলেও আগতে মিছ ইণ্ডিয়া হ’ব পাৰিব বুলি ভবা নাছিল বুলি প্রকাশ কৰে৷ তেওঁ একো নভবাকৈয়ে মাত্র মডেলিং কৰি যোৱা বুলিও উল্লখ কৰে৷ বিমান বন্দৰত অৱতৰণ কৰাৰ আগমুহূর্তত মাতৃভূমিৰ অপৰূপ সৌন্দর্য দেখি আৱেগিক হৈ পৰা বুলিও তেওঁ উল্লেখ কৰে৷ আনহাতে বিহুৰ বতৰত ঘৰলৈ আহি বিহুতলীত বিহু নোচোৱাৰ প্রশ্নই নুঠে বুলি উল্লেখ কৰি প্রিয়দর্শিনীয়ে কয় যে তেওঁ অসমৰ জীয়ৰী, গতিকে তেওঁৰ তেজতে বিহু আছে৷ ১৯ এপ্রিললৈ অসমত থাকিব বুলি প্রকাশ কৰি তেওঁ এতিয়া মিছ ৱর্ল্ড প্রতিযোগিতাৰ বাবে জোৰদাৰ প্রস্তুতি চলাই থকা বুলিও কয়৷ প্রণিধানযোগ্য যে মেধা, সৌন্দর্য আৰু বাক্পটুতাৰ বলেৰে ফেমিনা মিছ ইণ্ডিয়া প্রতিযোগিতাত জয়ী হোৱা প্রিয়দর্শিনীক চাবলৈ আজি পুৱাৰে পৰা বৰঝাৰ বিমান বন্দৰত বহুসংখ্যক লোকে ভিৰ কৰে৷ এইকেইদিন পৰিয়াল, বন্ধু-বান্ধৱৰ উপৰি কেইবাটাও অনুষ্ঠানত প্রিয়দর্শিনীয়ে অংশগ্রহণ কৰিব বুলি জানিব পৰা গৈছে৷ উল্লেখযোগ্য যে ধুবুৰীৰ প্রবীণ চেটার্জী আৰু পাপিয়া চেটার্জীৰ কন্যা প্রিয়দর্শিনী গুৱাহাটীৰ মাৰিয়া পাব্লিক স্কুলৰ প্রাক্তন ছাত্রী৷ বর্তমান দিল্লী বিশ্ববিদ্যালয়ৰ অধীনস্থ হিন্দু কলেজৰ স্নাতক পর্যায়ৰ ছাত্রী প্রিয়দর্শিনীয়ে অৱশ্যে এফ বি বি ফেমিনা মিছ ইণ্ডিয়া প্রতিযোগিতাত নতুন দিল্লীক প্রতিনিধিত্ব কৰিছিল৷ বিগত ৯ এপ্রিলৰ নিশা মায়ানগৰী মুম্বাইৰ যশ ৰাজ ফিল্ম্ছ ষ্টুডিঅ’ত অনুষ্ঠিত হোৱা চূড়ান্ত প্রতিযোগিতাত প্রিয়দর্শিনীয়ে ফেমিনা মিছ ইণ্ডিয়া ৱর্ল্ড ২০১৬ খিতাপ অর্জন কৰিছিল৷ দেশৰ ২১গৰাকী ফাইনেলিষ্টক পিছ পেলাই প্রিয়দর্শিনীয়ে চূড়ান্ত বিজয়ী হ’বলৈ সক্ষম হোৱা এই প্রতিযোগিতাত বিচাৰকৰ আসনত আছিল সঞ্জয় দত্ত, যামিনী গৌতম, মনীষ মালহোত্রা, অর্ুন কাপুৰ, কবীৰ খান, এমি জেকছন, ছানিয়া মির্, একতা কাপুৰ আদি দেশৰ ক্রীড়া, ফেশ্বন, চলচিচত্র আদি জগতৰ প্রখ্যাত লোকসকল৷ কৰণ জোহৰ, শ্বাহৰুখ খান, বৰুণ ধাৱান, শ্বাহিদ কাপুৰ আদিৰ দৰে চেলিব্রিটিও অনু্ষ্ঠানত উপস্থিত আছিল৷
www.thejanambhumi.com/
