বাজেটৰ দ্বিভাষিক ছবি ‘এপাহ ফুলিল এপাহ সৰিল’ (অসমীয়া) আৰু ‘পূৰৱ কী আৱাজ’ (হিন্দী) মুক্তিৰ বাবে সাজু হৈ উঠিছে৷ ২০১৫ বর্ষত নির্মাণ হোৱা ব্যয়বহুল এই ছবিখনৰ শেষৰ কামখিনি বিশেষকৈ আৱহ সংগীত, সম্পাদনা আদি মুম্বাইত ২০১৬ৰ মার্চৰ তৃতীয় সপ্তাহত সম্পন্ন হয়৷ অসমৰ চলচিচত্রপ্রেমী ৰাইজৰ বাবে প্রখ্যাত পৰিচালক চন্দ্র মুদৈয়ে দিয়া ভাল খবৰটো হ’ল যে ১৫ আগষ্টৰ স্বাধীনতা দিৱসৰ আগে আগে ‘পূৰৱ কী আৱাজ’ ১২ আগষ্টত সমগ্র ভাৰততে মুক্তি দিয়াৰ কথা বিবেচনা কৰি থকা হৈছে৷ ভাৰতবর্ষৰ স্বাধীনতা আন্দোলনত ব্রিটিছৰ গুলীত মৃত্যুবৰণ কৰা একমাত্র কিশোৰী শ্বহীদ কনকলতা বৰুৱাৰ ওপৰত নির্মাণ হোৱা এই দ্বিভাষিক ছবিখনত অসমৰ সাম্প্রতিক উগ্রপন্থী সমস্যাকো সমান্তৰালভাৱে তুলি ধৰিবলৈ চেষ্টা চলোৱা হৈছে৷ সংস্কৃতিৱান ব্যক্তি লোকনাথ ডেকাই প্রযোজনা কৰা এই দ্বিভাষিক ছবিখন চন্দ্র মুদৈৰ সপোনৰ প্রকল্প বুলি নিজেই স্বীকাৰ কৰিছে৷ চন্দ্র মুদৈয়ে এতিয়ালৈকে নির্মাণ কৰা ১১খন ছবিৰ কাহিনী, বৈশিষ্ট্য আৰু পৰিচালনাৰ ফালৰ পৰা ‘এপাহ ফুলিল এপাহ সৰিল’ সম্পূর্ণ পৃথক৷ এই দ্বিভাষিক ছবিখনৰ অসমীয়াখনৰ মুক্তিৰ দিন এতিয়াও ঠিৰাং হোৱা নাই৷ প্রযোজক বর্তমান মুম্বাইত হিন্দী সংস্কৰণৰ বিতৰণক লৈ ব্যস্ত বুলি জানিব পৰা গৈছে৷ সম্প্রতি অসমীয়া ছবি জগতলৈ যি স্থবিৰতা আহি পৰিছে, সেয়া মুদৈৰ নতুন ছবিখনে আঁতৰাব বুলি চিত্রপ্রেমী ৰাইজে বৰ আশাৰে বাট চাই আছে৷ গতানুগতিক আৰু একঘেয়ামিৰ পৰা আঁতৰি নির্মাণ কৰা এই দ্বিভাষিক ছবিখনৰ হিন্দী সংস্কৰণ ‘পূৰৱ কী আৱাজ’ৰ এক প্রদর্শনী সাত জানুৱাৰীত নতুন দিল্লীৰ ফিল্ম ডিভিজন অডিটৰিয়ামত অনুষ্ঠিত হৈ যায়৷ সেইদিনা নতুন দিল্লীত ছবিখন উপভোগ কৰি বিতৰকৰ লগতে দর্শকে গভীৰ সন্তুষ্টি প্রকাশ কৰিছিল৷ বলিউডৰ ছবিৰ লগত ফেৰ মাৰিব পৰাকৈ নির্মাণ কৰা হৈছে ‘পূৰৱ কী আৱাজ’৷ ছবিখনত চন্দ্র মুদৈক পৰিচালনাত সহায় কৰিছে দীপক ৰয় আৰু স্বপ্নজিৎ বৰকাকতীয়ে৷ ডাঃ হিতেশ বৰুৱাই সংগীতেৰে সজোৱা এই দ্বিভাষিক ছবিখনত অভিনয় কৰিছে উর্মিলা, নিপন গোস্বামী, দেৱাশীষ বৰঠাকুৰ, ডাঃ তপন শর্মা, যতীন খনিকৰ, শিশু শিল্পী ৰ’দালি বৰা, জাফ্রি আদিয়ে৷
www.thejanambhumi.com/
No comments:
Post a Comment